Gernika-Lumon Juan Calzada kalean milioi erdi euro baino gehiagoko eraberritze integrala egingo da. Proiektuak, 2026an gauzatuko denak, azpiegiturak berritu eta oinezkoen irisgarritasuna hobetuko dau hiri-ardatz nagusietako batean
Juan Calzada kalea, Gernika-Lumoko arteria nagusietako bat, eraldaketa integral baterako prestatzen ari da. Eraldaketa horrek Gurutze Gorriaren eraikinaren eta Barandiaran establezimenduaren arteko tarteari eragingo dautso, 235,39 metroko luzerarekin. Esku-hartzeak 507.881,73 euroko aurrekontua dauka, eta kalearen irudia berritzeaz gain, ibilgailuen trafikoaren eta oinezkoen arteko bizikidetza birdefinitzea dauka helburu.
Proiektuak saneamendu- eta hornidura-sareak erabat ordezkatzea aurreikusten dau, lurpeko azpiegiturak modernizatzeko eta epe luzerako funtzionamendua hobetzeko. Zoladuraren gainean, esku-hartzeak irisgarritasunean eta segurtasunean jarriko dau arreta, herritarrentzat hiri-ingurune atseginagoa sortzeko helburuarekin. “Oinezkoentzako kale irisgarriagoa eta seguruagoa egitea da helburua”, adierazi dau Jose Maria Gorroño alkateak, eta hiri-eredu orekatuago baterantz aurrera egitearen garrantzia azpimarratu dau.
2026rako aurreikusita dagozen obrek hiru hilabete inguru iraungo dabe. Jarduketa horren bidez, jarraipena emango jako pasealekuaren eta Gurutze Gorriaren eraikinaren arteko zati berrituari, eta, horrela, udalerriko ardatz jendetsuenetako bat hobetuko da. Esku-hartzea espazio publikoa hobetzeko udal-estrategiaren barruan kokatzen da, hiribildu osoan oinezkoen mugikortasuna eta hiri-kalitatea bultzatzera bideratuta.
