Gernika-Lumoko Segundo Olaeta Musika Eskola Publikoak berrikuntza garrantzitsuak iragarri dauz datorren 2026-2027 ikasturterako, betiere herritar helduen beharrizanei eta eskaerei erantzun egokiagoa emoteko asmoz. Zentroak bere ordutegiak luzatzea erabaki dau, musika ikasten hasi gura daben pertsona helduei zerbitzu emoteko, baita laneko edo familiako betebeharrengatik euren ikasketak bertan behera utzi behar izan ebezenei horiei berriro ekiteko aukera errazteko be. Modu honetan, adina muga izan ez egoteko eta norbanako bakoitzaren egoerara egokitzeko apustua egin dau Gernika-Lumoko musika eskolak.
Ikasturte berritik aurrera, hainbat musika-tresnaren eskolak goizez jasotzeko aukera egongo da Gernikan. Eskaintza horren barruan txirula, gitarra, pianoa, txistua, panderoa, alboka, metalezko haize-instrumentuak, biolina eta biolontxeloa egongo dira aukeran. Zentrotik adierazi dabenez, interesatuek musika eskolara hurbiltzeko aukera daukie gogokoen daukien tresnari buruz galdetzeko, eta arduradunek norberaren gustu zein ezaugarrietara hobekien egokitzen den aukera bilatzen lagunduko dautsie, baita ordutegi egokiena zehazten be.
Instrumentuez gain, musika eskolak ahots proiektu berri bat jarriko dau martxan kantatzea gogoko duten helduentzat, Rockaldunak izenekoa. Euskal pop-rockaren inguruko ekimen honek 80ko hamarkadatik gaur egunera arteko euskal kanta ezagunak berinterpretatzea dauka helburu, bakarlaria, korua eta banda uztartuz. Ekimen berezi honetan parte hartu gura daben herritarrek musika eskolara jo dezakete izena emoteko, Foru Plazako egoitzan, edota kulturagernika-lumo.eus webgunearen eta adierazitako bide ofizialen bitartez harremanetan jarriz.
