Dana prest dago, Muruetako San Kristobal jaiak ospatzeko. Aurten be, herriko jai batzordeak adin guztientzako planak prestatu dauz uztailaren 10etik 12ra bitartean. Giro itzela ziurtatuta dago Urdaibaiko bihotzean.
Jaiak indartsu hasiko dira uztailaren 10ean, barikuan. Eguerdiko 13:00etan jatorrizko mezea egongo da eta, amaitu ostean, indarrak batzeko hamaiketako bikaina eskainiko jake bertaratutakoei. Asteburuari hasiera emoteko modu hoberik ez!
Uztailaren 11 izango da egun handietako bat. Gastronomia zaleek hitzordu garrantzitsua daukie, V. Paella Txapelketa ospatuko da-eta. Sukaldari onenek goizeko 12:00etan emon beharko dabe izena. Gero, arratsaldeko 14:00etan, epaimahaiak platerak dastatu eta sari banaketa egingo dau.
Muruetako gaztetxoenek be ondo pasatzeko aukera ederra edukiko dabe zapatu arratsaldean:
-
15:00etan: Umeen jolasak eta herriko joko tradizionalak.
-
17:00etan: Xaibor diskofesta, plaza dantzan jartzeko eta energiaz betetzeko.
Dantzarako tartea domekan
Jaiak borobiltzeko, uztailaren 12an, domeka, eguerdiko 12:30ean mezea egongo da. Ostean, kulturari tartea zabalduz, Urdaibai Dantza Taldearen erakustaldi politaz gozatu ahal izango dabe herritarrek eta bisitariek.
