Bermeoko eta Euskal Herriko hainbat eragile sozialek zein sindikalek —tartean Ndawi Senegal, LAB, ELA eta Kabidxe elkarteak— agiri bateratua kaleratu dabe gure portuetan eta baratzeetan gertatzen ari den lan-esplotazino neokolonial eta arrazista irmoki salatzeko.
Salatu dabenez, gure mahaiak hornitzen dabezan nekazaritzaren eta arrantzaren atzean sistemak antolatutako lan-esplotazioa eta erakunde-arrazakeria dagoz. Atzerritarren Legeak pertsonak paperik gabe mantentzen dabezela gogorarazi dabe, patronalaren mesedera dagoen xantaiarako bidea erraztuz: soldata baxuak, lan-ordu luzeak eta segurtasun-neurri eza.
Lau eskaera nagusi eta elkartasun deialdia
Egoera honi aurre egiteko, eragile sinatzaileek lau eskaera nagusi mahaigaineratu dabez:
-
Atzerritarren Legea bertan behera iztea eta langile guztien erregularizazio osoa eta baldintzagabea bermatzea.
-
Patronalaren erantzukizun penalak ezartzea prekarietateak eragindako lan-istripu eta heriotzen aurrean.
-
Lan Ikuskaritza irmoa izatea portu zein nekazaritza-eremuetan zigor eredugarriak jartzeko.
-
Benetako antiarrazismoa praktikan jartzea, ezin delako km 0 edo elikadura-subiranotasunaz hitz egin oinarriko langileak esplotatzen badira.
Halaber, emakume arrazializatuek lan-ingurune desberdinetan jasaten dabezan eraso zein jazarpen sexualak ere publikoki salatu dabez.
Bide batez, Sevillan lanean hildako komunitate senegaldarreko kide baten gorpua Senegalera bueltatzeko eta familiari laguntzeko elkartasun deialdia egin dabe. Bermeoko Ndawi elkarteak kontu korronte hau zabaldu dau laguntza bilitzeko: ES76 2095 0314 3091 2207 0899.
