Uda sasoia atsedenerako garaia izaten da gehienbat, baina baita irakurketaz lasaitasunez gozatzeko aukera paregabea be. Hori dela eta, Bermeoko Udalak martxan jarri dau barriro bere Udako Liburutegia aste honetan. Zerbitzu hau zabalik egongo da abuztuaren 8ra arte, eta herritar zein bisitariei itsasoaren ondoan irakurketaz zein aisialdiaz gozatzeko txoko berezi bat eskaintzea dau helburu nagusi.
Itsasondoan kokatutako gune honek zerbitzu zabala eskainiko dau, adin guztietako irakurleei egokituta. Bertaratzen direnek liburuak etxera eramateko mailegu-zerbitzua erabili ahal izango dabe, eta aldizkariak bertan irakurtzeko zein etxera eroateko aukera be egongo da. Materialari dagokionez, ume, gazte zein helduentzako irakurgai eta material ugari egongo da eskura, norberaren zaletasunetara egokitutako istorioetan murgiltzeko. Gainera, dinamismoa emoteko, umeentzako tailerrak antolatuko dira astean behin, txikienek be sormena landu deien.
Zerbitzuaren ordutegia asteko egunen arabera egokituko da, herritarrei aukera gehien emateko asmoz. Horrela, astelehenetan arratsaldez egongo da zabalik, 16:00etatik 19:00etara. Martitzenetik barikura, barriz, ordutegia zatitua izango da, goizez 11:00etatik 14:30era eta arratsaldez 16:00etatik 19:00etara. Azkenik, zapatuetan goizez bakarrik zabalduko ditu ateak, 11:00etatik 14:30era, asteburuko planei literatur ukitua emateko.
Bermeoko Udaleko Liburutegi zerbitzutik herritar guztiak gonbidatu nahi dabez txoko honetara hurbiltzera, egunerokoan atsedenaldi bat hartu, istorio barrietan murgildu eta udaz beste modu baten gozatzeko.
