Gernika-Lumoko kaleak sormenez eta kolorez bete ziran joan dan zapatuan Luis Iriondo Aire Zabaleko Pintura Lehiaketaren bosgarren edizinoan. Arteskolak, Kultur Etxeagaz elkarlanean antolatutako ekimen honek hogei bat artista inguru bildu ebazan, herriko ondarea, paisaiak eta eguneroko bizitza beren mihisetan irudikatzeko asmoz.
Egun osoan zehar, herritarrek zein bisitariak aukera paregabea izan eben artelanak zuzenean nola sortzen ziran ikusteko, herriko zeinbait txokotan banatuta egoan artista bakoitzaren lanari esker.
Sari nagusiak eta tokiko talentuaren aitortza
Mahai-inguruaren eta epaimahaiaren eztabaidaren ostean, Adrián Marmolejo Clarhed artistak eraman dau lehenengo saria, 1.000 euroko irabaziagaz. Bigarren saria, 600 eurokoa, Carlos Espigarentzat izan da; eta hirugarren saria, berriz, María Teresa Durá Sepulcrek lortu dau (400 euro).
Bestalde, lehiaketak herriko sortzaileen lana be balioan jarri dau:
-
Etxeko artista onenaren saria (300 €): Chris Blancorentzat izan da.
-
Publikoaren saria (300 €): Iker Mugarra San Martínek eskuratu dau, eguna amaitzean egindako erakusketara hurbildutako pertsonen botoei esker.
Sormena eta memoria historikoa uztartuz
Ekimen honek Luis Iriondo pintorea eta 1937ko Gernikako bonbardaketatik bizirik atera zirenen artetik azkenetakoa izandakoa gogoratzen dau. Urtez urte, lehiaketa hau udako kultura-hitzordu nagusien artean finkatuz doa, sorkuntza artistikoa eta memoria historikoa era bikainean buztartuz.
Erakusketako lan guztiak ikusteko eta informazio gehiago jasotzeko, bisitatu Gernika-Lumoko Kultur Etxearen ataria.
