Ereñoko Udalak urrats garrantzitsua emon dau herritarren osasuna eta segurtasuna bermatzeko bidean. Bihotz-larrialdien aurrean erantzuteko gaitasuna hobetzeko asmoz, herriko desfibriladore sarea barritu eta handitu dau. Hemendik aurrera, bi desfibriladore egongo dira udalerrian erabilgarri.
Barrikuntza nagusietako bat Gabikako auzoan dago. Udalak gailu barri bat jarri dau bertan, Txokoaren sarreraren ondoan, auzokideek larrialdi egoera batean hain funtsezkoa den baliabide hau gertuago izan daiten.
Gainera, desfibriladore erdiautomatiko biak babes-kutxa seinaleztatuetan gorde dira, eta abisu zein geolokalizazio-sistemak daukiez azkar aurkitzeko.
Prestakuntza saioak herritarrentzat
Gailuak jartzeaz gain, Udalak prebentzioaren eta formazioaren aldeko apustua egin dau. Proiektuak 4.320 euroko inbertsioa dauka (BEZa kanpo) eta hamar lagunentzako prestakuntza-saioa biltzen dau. Bertan, gailua erabiltzeko jarraibideak eta bihotz-biriketako bizkortze (PCR) oinarrizko teknikak ikasiko dira.
