Visesa sozietate publikoak eta Bermeoko Udalak lankidetza-hitzarmena sinatu dabe astelehen honetan, herrian erregimen orokorreko babes ofizialeko (BOE) 52 etxebizitza inguru eraikitzeko. Sustapen barri hau Kaltzadape kalean egingo da, eta udalerriko etxebizitza eskuragarrien eskaintza zabaltzea dau helburu nagusi. Akordioa Bermeoko udaletxean gauzatu da, eta bertan egon dira Carlos Quindos Visesako zuzendari nagusia eta Nadia Nemeh Shomaly herriko alkatea.
Hitzarmen honen arabera, etxebizitzak eraikiko diran partzelaren jabea dan Bermeoko Udalak doan lagako deutso lurzorua Visesari sustapena aurrera eraman ahal izateko. Lur saileko lursailak 1.200,74 metro karratuko azalera dau guztira, eta 5.237,91 metro karratuko eraikigarritasun garbi erabilgarriko aprobetxamendua eskaintzen dau. Jarduketa honegaz, Etxebizitza eta Hiri Agenda Sailak udalerriko etxebizitza eskuragarrien parke publikoa handitu nahi dau, Denis Itxaso sailburuak joan dan martxoaren 4an Kurtzio, Zarragoitxi eta Itxasbegi auzoak biziberritzeko proiektura egindako bisitan iragarri eban legez.
Proiektua errazteko asmoagaz, Bizkaiko udalak konpromisoa hartu dau Eraikuntza, Instalazio eta Obren gaineko Zerga (EIOZ) arautzen dauen Ordenantza Fiskalaren aldaketa bultzatzeko, alokairurako babes publikoko etxebizitzei % 95eko hobaria emateko zerga-kuotan. Horregaz batera, Hirigintza eta Ingurumen Zerbitzuen Tasagatiko salbuespena deklaratuko dau Udalak. Carlos Quindosek azaldu dauenez, aurreikuspena da proiektua aurtengo irailean lizitatzea, guztira 10,1 milioi euro inguruko inbertsioa eragingo dauen jarduketan lehenbailehen aurrera egiteko. Behin eraikuntza amaituta, alokairuko etxebizitzak Alokabidek kudeatuko dauz.
