Osagaiak
- 6 golden sagar, zurituak eta lau puskatan zatituak, barruko zuztarra kendu eta limoi zukuaz igurtziak
- 125 g gurin bigun
- 150 g azukre-hauts
- Bainila zati bat, irekia eta aletua250 g hostore, tartaren moldearen neurriko disko mehe batean luzatua.
Errezeta
Burdinazko padera bat erabiliko dogu tarta hau labean sartzeko, plastikorik gabea, lasai asko labean sartu eta etxea erretzeko moduko istilurik sor ez dezagun. Gurinez igurtziko dogu padera lehenik, oparo igurtzi ere hondoan eta bazterretan.
Bainila zati bitan banatu, eta aterako doguz barruko aleak ondoren. Aleak eta azukrea irabiagailuan sartu eta indar betean txikituko doguz bertan, bainila-azukre usaintsua lortu arte. Azukre horren zati bat hautseztatuko dogu gero, aurrez gurinez igurtzitako paderaren hondoan. 12 sagar zati ipiniko doguz hondoan, estu-estu ipini ere, eta hautseztatuko dogu azukre gehiago gainetik, gurin zati batzuez gainera. Bigarren sagar geruza bat ipiniko dogu ondoren gainean, geratzen zitzaizkigun 12 zatiak amaitu arte. Azukrea hautseztatuko dogu berriro ere, geratzen zaigun azukre guztia bukatu arte, eta beste gurin puska batzuk ere ipiniko doguz gainetik.
Padera aluminio-paperez estali, eta sartuko dogu labean, 160º-ko tenperaturan, 2 bat ordutan, sagarrak beren zukuan karamelu bihur daitezen arte. Egoste puntua neurtzeko, aski izango da labana baten ahoa sartzea. Labanak erraz sartu behar du, eta kolore gorri polit eta erakargarria hartu behar dute sagarrek. Aluminio-papera kenduko dogu ondoren. Padera labetik ateratzerakoan ikusten badugu sagarrak beren zukuan igerian dabiltzala, ipiniko doguz su eztian, zukua urritu eta hondoa lehor gera dadin arte.
Labetik kanpo utziko doguz padera eta sagarrak, giroko tenperatura har dezaten. Horren ostean, hostorea moztuko dogu, paderaren inguruaren neurri berean, edo pixka bat handiagoa. Hostoreak ez du, inolaz ere, padera baino txikiagoa izan behar, erretzean uzkurtu egiten baita eta sagarrak agerian geratuko bailitzateke. Hostorea sagarren gainean ipini, eta ertzak beherantz okertuko doguz, ongi estutuz, sagarren inguruan gera dadin. Sardexka batez ziztatuko dogu ondoren, sagarrek ateratzen duten lurruna kanpora irten dadin, eta berriro ere labean sartuko dogu tarta, 170º-ko tenperaturan, 30 bat minutuan. Hostore guztia ongi txigortu ondoren, labetik atera eta utziko dogu hozten. Tarta ateratzeko, sutan jarriko dogu padera 30 segundotan, bigundu eta sagarrak karamelutik aska daitezen. Platera baten gainean irauliko dogu ondoren, tortilla bat balitz bezala. Errezetan ikusi dozuen bezala, tarta hau alderantziz erreko dogu labean.
Modu berean egin dezakegu halaber melokotoi, abrikot edo aran eder batzuekin, eta baita udareekin ere.
