Urdaibaiko soinu-paisaia menderatu dauen maisu handiaren lana eta bizitza argitara ekarri dabe “Urdaibaiko Soinuak” erakusketa barrian. Gautegiz Arteagan jaiotako artisauaren ibilbidea 2027ko urtarrilaren 10era arte egongo da ikusgai Gernikako museoan, kontzertu, bisita gidatu eta berbaldiekin batera.
Euskal Herria Museoak ateak zabaldu dautsoz berriro eskualdeko historia musikalari. Gaur goizean aurkeztu dabe “Urdaibaiko Soinuak. Lope Alberdi organogilea” erakusketa, 1868an Gautegiz Arteagan jaiotako maisuaren irudia eta ondarea herritarrei hurbiltzeko asmoz. Hamarkadatan zehar bigarren mailan geratutako izena izan bada be, egindako ikerketa barri bati esker, Alberdik mende bat baino gehiagoz Busturialdean zein nazioartean utzitako aztarna sakona azaleratu dabe.
Erakusketaren aurkezpenean izan dira Leixuri Arrizabalaga Euskara, Kultura eta Kirol diputatua, Leire Irazabal museoko zuzendaria, eta Itziar Larrinaga zein Benantzi Bilbao komisarioak. Arrizabalagak azpimarratu dauenez, “Bizkaian eta, bereziki, Busturialdean kontserbatutako organoek balio kalkulaezina dabe”, eta azpimarratu dau erakundeen apustua dela kulturaren eta herri-ondarearen arteko lotureari bizirik eustea.
Bartzelonatik mundura zabaldutako lana
Lope Alberdik ibilbide profesional ikusgarria garatu eban Bartzelonan finkatu ostean. Bere tailerretik urtandako instrumentuak Iberiar penintsulako eliza askotara ez ezik, Amerikara eta Filipinetara be heldu ziren. Halere, bere obraren bildumarik garrantzitsuena hemen bertan dago, Bizkaian, hamabost organo gordetzen baitira.
Josep Maria Berenger-ek diseinatutako erakusketak ibilbide osotu bat proposatzen dau:
-
Jatorrizko dokumentuak: Planoak, argazkiak, marrazki teknikoak eta garaiko lanabesak.
-
Ikus-entzunezkoak: Berariaz sortutako hiru ikus-entzunezko. Bitan Busturialdeko elizetan dauden Alberdi organoen berezitasunak azaltzen dira, eta hirugarrenean, berriz, instrumentu konplexu honen barruko funtzionamendua erakusten da.
-
Hizkuntzak: Panel nagusiak euskaraz eta gaztelaniaz daude, eta ingelesez zein frantsesez irakurtzeko QR kodeak jarri dabez.
Ondare hauskorra zaintzeko deia: UOJE Urdaibaiko Organoak elkarteak eta Urremendik, Bilboko Elizbarrutiaren eta Eusko Jaurlaritzaren laguntzagaz, 22 urte daramatzate eskualdeko soinu-ondare hau babesten. Erakusketa honek artisau-lanbide hau zein gure elizetako altxorrak zaintzearen garrantziaz hausnartzeko aukera ere eskaintzen dau.
Agenda: Kontzertuak, bisita gidatuak eta hitzaldiak
Erakusketagaz batera, egitarau zabala antolatu dabe datozen hilabeteetarako. Ekitaldi gehienek izena ematea eskatzen dabe aldez aurretik Euskal Herria Museoan.
Hona hemen data nagusi batzuk zure agendan gordetzeko:
-
Uztailak 25 (18:00): UOJEko kontzertua Mertzede-San Bartolome elizan (Gernika-Lumo).
-
Abuztuak 13 eta 14: Bisita gidatuak erakusketara eta Santa Klarako organora, eta mahai-ingurua Bizkaiko organoen etorkizunaz.
-
Abuztuak 15 (20:00): UOJEko kontzertua Andra Mariaren elizan (Mundaka).
-
Irailak 25 (18:00): Erakusketako katalogoaren aurkezpena eta Bermeoko San Frantzisko elizako organoaren zaharberritzeaz hitzaldia.
-
Urriak 3 eta 17 (11:00): European Heritage Days / Europako Ondare Jardunaldietako bisita bereziak.
-
Azaroak 12 (17:00): Bisita Bermeoko San Frantzisko elizan zaharberritzen ari diren organora (Bermeo).
-
Abenduak 18 (18:00): “Hauspo bete-betean”, umorezko bitartekaritza-jarduera Itziar Saenz de Ojerren eskutik.
-
Urtarrilak 8 (18:00): Benantzi Bilbaoren amaiera-kontzertua Euskal Herria Museoan.
