Gernika-Lumo berriz be aire libreko margo-oihal handi bat bihurtuko da uda honetan. Datorren uztailaren 26an, herriak ‘Luis Iriondo’ Aire Libreko Pintura Lehiaketaren bosgarren edizioa hartuko dau. Arteskola elkarteak antolatu dau ekimena, Kultur Etxearen laguntzagaz, eta txoko guztietako artistak batuko dauz herriko bazterrik esanguratsuenak zuzenean margotzeko.
Lehiaketa honek Luis Iriondo omentzen dau, margo-lari autodidakta eta 1937ko Gernikako bonbardaketatik bizirik atera zirenetako bat, bere ibilbide artistikoa herriaren memoria historikoari lotuta egon zelarik. Bere irudiak izena ematen jako urtez urte hiri-espazioa sormen-lekoki bihurtu eta artea herritarrengana hurbildu nahi dauen lehiaketari.
Parte-hartzaileek 18 urtetik gorakoak izan behar dabe eta goiz osoa izango dabe herrian, paisaietan, ondarean edo eguneroko bizitzan oinarritutako lan bakar bat egiteko. Gaia librea izango da, baita erabilitako teknika be (olioa, akrilikoa, akuarela edo teknika mistoak).
Eguna 09:00etatik 10:00etara hasiko da, Kultur Etxean euskarriak zigilatuz. Une horretatik aurrera, margolariak udalerriko hainbat gunetan banatuko dira eta euren lanak 14:00ak baino lehen entregatu beharko dabez.
Foru Plaza, Udaletxe ingurua, Kultur Etxea eta Bakearen Museoa izango dira ekintza gehien bilduko dabezan guneak, baina artistek Gernika Lumoko edozein txoko aukeratu ahal izango dabe. Lehiaketaz haratago, helburua sormen-prozesua ikusleei hurbiltzea da, herritarrek eta bisitariek goiz osoan zehar lanak nola sortzen diren ikusteko.
Lehiaketak 2.600 euro banatuko dauz saritan. Irabazleak 1.000 euro jasoko dauz, bigarrenak 600 euro eta hirugarrenak 400 euro. Gainera, 300 euroko sari bat emongo jako tokiko artista batek egindako lan onenari, eta herri-bozkaketaz hautatutako beste 300 euroko sari bat be egongo da, betiere epaimahaiaren sariekin bat ez bator.
