Muruetako etorkizuneko hirigintza diseinuak beste urrats garrantzitsu bat emongo dau uztail honetan. Herriko Hiri Antolamenduko Plan Orokorraren (HAPO) aurrerakinari jagokon gehigarria sakon aztertzeko helburuagaz, udal arduradunek eta teknikariek batzar ireki eta parte-hartzailea antolatu dabe herritarrentzat. Saio honetan, batez be, herrian pisu handia daukan eta zeresan ugari emoten dabilen Ontziolako eremuaren etorkizuna eta horri lotutako proposamenak izango dira mahai gainean.
Ekimen honek herritarren kezkak entzun eta planari ekarpen zehatzak egiteko bidea erraztu nahi dau. Antolatzaileek jakitera emon dabenez, hitzaldi informatiboaz gain, hausnarketarako eta lanerako tailer praktiko bat be egingo dabe bertaratzen direnek euren proposamenak eta iradokizunak zelan aurkeztu ahal dabezan argitzeko. Hitzordua uztailaren 21ean, asteartea, arratsaldeko 18:00etan izango da, Muruetako Udaletxeko Osoko Bilkuren Aretoan.
Garrantzitsua da gogoratzea saioan parte hartu nahi daben herritar guztiek izena aldez aurretik emon beharko dabela antolakuntza egokia bermatzeko. Izena emateko orria betetzea ezinbesteko baldintza izango da aretora sartzeko, eta izen-ematea Muruetako Udalaren webgune ofizialean edo herriko bulegoetan egin ahal da.
Herriaren etorkizuneko garapen jasangarria eta hirigintza plana guztion artean adosteko aukera paregabea da honako hau.
