Gernika-Lumoko txikizkako merkataritzea herriko bizitza ekonomiko eta sozialaren erdigunean kokatuko da barriro be. Udaleko Merkataritza Sailak abian jarri dau Nik Gernikan 2026 sarien VI. edizinoa, herriko jarduerari eta nortasunari eusten deutsoen saltoki zein taberna eta jatetxeen lana aitortzeko asmoz.
Aurtengo deialdiak lau sari jasotzen dauz, bakoitza 1.000 euroko poltsagaz hornitua, guztira 4.000 euro banatuz. Sari honeek lau kategoria zehatzetan banatuko dira herriko negozioen balioa nabarmentzeko:
- Ibilbide profesionala: Herrian txertatuta dagozan eta ibilbide sendoa daukien negozioak sarituko dauz.
- Merkataritza berritzailea eta denda barriak: Eskari eta kontsumo eredu barrietara egokitzen jakin daben ekimenak goratuko dauz.
- Auzoko merkataritzea: Gertuko saltokiek auzoko bizitzea dinamizatzeko daukien garrantzia aitortuko dau.
- Ostalaritzea: Udalerriko nortasun gastronomiko eta soziala sendotzen laguntzen daben taberna eta jatetxeak nabarmenduko dauz.
Ekimen honen bidez, kontsumo ohituren aldaketen eta merkataritza guneen homogeneizazioaren aurrean, bertako negozioek egiten daben ahalegina jarri gura da balioan. Iazko edizinoan, Kooperatiba San Isidro Gernika (ibilbidea), Lumiére Concept (berritzailea), Barandiaran Denda (auzoko denda) eta Boliña Zaharra (ostalaritzea) izan ziran sarituak.
Izena emoteko epea abuztuaren 28an amaituko da
Lehiaketan parte hartu gura daben Gernika-Lumoko establezimenduek Udalaren GERTU herritarrentzako arreta zerbitzuan edo administrazio elektronikoaren bidez aurkeztu beharko dabe euren hautagaitzea. Eskaeregaz batera, merezimenduak azaltzen dabezan memoria bat eta argazkiak entregatu beharko dira. Hautagaitzak aurkezteko epea abuztuaren 28ra arte egongo da zabalik.
Balorazio irizpideen artean, epaimahaiak kontuan hartuko dauz negozioaren ibilbidea, berrikuntza, herriko bizitzagaz dauen inplikazinoa, Gernika-Lumoko irudiaren sustapena eta merkatuaren behar barrietara egokitzeko gaitasuna.
Argibide gehiago gura dabenek Merkatu Plazako lehenengo solairuan dagoen Merkataritza Bulego Teknikora jo dezakete, edota 94 625 79 40 telefonora deitu zein gatc@gernika-lumo.eus helbide elektronikora idatzi.
