Bermeok Busturialdeko Dantzari Txiki Eguna hartuko dau domekan, eskualdeko 250 dantzari gazte batuz

Bermeoko Lamera itzuliko da euskal dantzaren eta jai giroaren erdigune izatera. Datorren domekan, ekainak 21, herriak XXXVIII. Busturialdeko Dantzari Txiki Eguna hartuko dau. Eskualdeko euskal dantzaren urteko hitzordurik garrantzitsuenetariko honek Busturialdeko dantzari gazteak elkartuko dauz tradizioa, kultura eta belaunaldien arteko transmisioa ospatzeko asmoz.

Aurtengo edizioak esanahi oso berezia dauka Bermeorentzat, herriko Alkartasuna Dantza Taldea bere 50. urteurrena ospatzen ari baita. Mende erdi honen harira, eskualdeko dantzarien topagune nagusi biak Bermeon egingo dira: domeka honetako Dantzari Txiki Eguna, eta udazkenean ospatuko den Busturialdeko Dantzari Eguna (azaroaren 7an, hain zuzen be). Joan dan hilean Bizkaiko Dantzari Eguna be Lameran ospatu zan ehunka dantzari eta ikuslegaz, eta oraingoan be inguru horixe izango da agertoki nagusia.
Nadia Nemeh Shomaly Bermeoko alkateak azpimarratu dauenez, “ohore handia da Bermeorentzat Busturialdeko Dantzari Txiki Eguna hartzea, are gehiago Alkartasuna Dantza Taldearen 50. urteurrena ospatzen ari garen urte honetan. Euskal dantza gure nortasunaren eta kultur ondarearen adierazpen garrantzitsuenetako bat da, eta pozgarria da ikustea belaunaldi berriek ilusioz eta konpromisoz eusten diotela tradizio horri. Domekan Lameran bilduko diren ehunka dantzariak erakutsiko dute gure kulturak etorkizun sendoa daukala”.

Zortzi dantza talde eta egitarau zabala

Guztira, 250 dantzari inguruk hartuko dabe parte ekimenean, Busturialdeko zortzi dantza talderen eskutik:

  • Alkartasuna Dantza Taldea (Bermeo).

  • Itxas Alde (Bakio).

  • Irrintzi Alai (Busturia).

  • Urdaibai (Forua).

  • Elai Alai (Gernika-Lumo).

  • Baso-Txoritxu (Ibarruri).

  • Lorea (Ibarrangelu).

  • Artie (Gautegiz Arteaga).

Jardunaldiaren helburu nagusia euskal dantzen transmisioa sustatzea eta ume zein gazteek urte osoan egindako ahalegina erakustea da, gure ondare immateriala bizirik mantentzeko.

Dantzari txikiek mota askotariko errepertorioa eskainiko dabe Lameran: Dantzari Dantza, umeen jolas-dantzak, Txulalai, Sardinerak, Markinako Zaragi Dantzak, Ziekoko dantzak, Txantxoak eta Makil Txikiak, Gorulariak eta Domingillo. Saioari amaiera borobila emoteko, talde guztietako dantzariak batera ariko dira Olagueko Esku Dantza interpretatzen.

Egitarauaren ordutegia:

  • 11:30ean: Dantza talde guztiak Taraskan elkartuko dira.

  • 11:45ean: Kalejira abiatuko da Lameraraino.

  • 12:00etan: Dantza emanaldia hasiko da.

Antolatzaileek herritar eta bisitari guztiak gonbidatu dabez ekitaldira, dantzaren bidez eskualdeko herrien arteko loturak sendotuko dabezan egun eder honegaz gozatu deien.

Azkenak