Musikea, tradizinoa eta jai giroa bueltatuko dira laster Gernika-Lumoko kaleetara. Herriko zaindariaren jaiak ate-janean dagozala, Jai Batzordeak aukeratu dau dagoeneko aurtengo kartel ofiziala. Janire Arrizabalaga sortzaileak irabazi dau lehiaketea “GERNIKA BIZI BAT OSPATZEN” izenburuko lanagaz. Aurkeztutako 16 lanen artean hautatu dabe berea, eta 600 euroko saria irabazi dau. Udalak azpimarratu dauenez, aurten adimen artifizialaren erabilerea arautzeko gidalerro barriak ezarri dira, sormen artistikoaren jatorrizkotasuna bermatzeko. Kartelaz harago, jaietako benetako motorra musika egitarau itzela izango da.
Herrian zehar hainbat esertoki egongo dira, eta musika eskaintzea lekuen arabera banatuko da:
Pasileku, zuzenekoen bihotza
Pasileku parkea izango da zuzeneko kontzertuen gune nagusienetako bat. Egitaraua egun honeetan banatuko da:
-
Abuztuak 14, jaiaren bezpera: Etorkizun Beltza eta Oxabi taldeen erritmo indartsuekin hasiko da giroa.
-
Abuztuak 15, Andra Mari eguna: Marte Lasarte, HOFE eta LaMia Mari igoko dira oholtzara, gazteentzako proposamen abangoardistagaz.
-
Abuztuak 16, San Roke eguna: 48280, Ezpalak eta Les Testarudes taldeen txanda izango da.
-
Abuztuak 17, San Roketxu: Apokhalipsis, Naxker eta Zirkinik Bez taldeek itxiko dabe gune honetako egitaraua.
San Juan Ibarra plaza: herri-musikea eta folka
San Juan Ibarra plazak kutsu herrikoiagoa eta folka ardatz daben alternatibak eskainiko dauz:
-
Abuztuak 14 (bezpera): Guanajuatoko Mariachi Imperial taldeak girotuko dau plaza.
-
Abuztuak 15 (Andra Mari): Los 5 Bilbainos taldearen bilbainada ezagunek hartuko dabe lekua.
-
Abuztuak 16 (San Roke): Afrika Bibang artistak eskainiko dau bere kontzertua, egun horretako musika aniztasuna aberastuz.
Lurgorrin jaien aurreko beroketa
Lurgorri auzoak aurretiaz ekingo deutso jaiari, abuztuaren 11n, martitzenean, euskal publikoarentzat oso erakargarria den kartel bategaz. Bertaratutakoak dantzan jartzeko arduradunak Sueder, Skabidean eta Altxaporru taldeak izango dira. Gauari amaiera borobila emoteko, DJ Elepunto arituko da musikea jartzen.
