Bermeoko Udalak ordenantza fiskalak barriro eguneratu dauz azken osoko bilkuran. Gehiengo zabalagaz eta tratu politiko handigaz, 2027ko urtarrilaren 1etik aurrera indarrean sartuko dan egonaldi turistikoen gaineko zerga barria onartu dau udalak, Bizkaiko Batzar Nagusien 3/2026 Foru Arauari jarraituz. Tasa barri honen helburu nagusia da turismoak herrian daukan eragina kudeatzea eta eredua jasangarriagoa egitea.
Tauletan oinarrituta eta herriko errealitate ekonomikoa zein etxebizitzaren egoera tentsionatua kontuan hartuta, hiru udal alderdiek adostu dabe tasa honek nolako izaera eukiko dauen. Erabilera turistikoko etxebizitzetan ezarriko da kargarik altuena: 6,50 euro pertsonako eta gau bakoitzeko. Beste ostatuetan, ostean, neurriko zergak egongo dira: hotel nagusietan 1,25 eta 5 euro artean, pentsio, aterpetxe eta kanpinetan 1,25 euro, eta nekazaritza-turismo zein landetxeetan 0,50 eta 0,75 euro artean, lehen sektoreari babesa emoteko asmoz.
Zerga honetatik kanpo geratuko dira hainbat talde eta egoera; hala nola, 18 urtetik beherako gazteak, desgaitasuna daukien pertsonak, osasun edo ikasketa arrazoiengatik datozenak edo gizarte-programek lagundutako bidaiak.
Beste alde batetik, osoko bilkurak barriro egokitu dau Eraikuntza, Instalazio eta Obren gaineko Zerga (EIOZ). Batetik, Elizak zeukan salbuespen historikoa kendu da. Bestetik, Visesagaz egindako hitzarmenaren bidez, %95eko hobaria ezarri da babes publikoko eta alokairu sozialeko etxebizitza barriak eraikitzeko obretan, herrian etxebizitza eskuragarria sustatzeko asmoz.
