Portuzarreko sarbide-kontrol sistema barria martxan da gaurtik Bermeon

Bermeoko Udalak gaur, ekainak 15, jarri dau indarrean Portuzarreko sarbide-kontrol sistema barria, udako portuko itxieragaz batera. Gaurtik hasi eta irailaren 20ra arte, Portuzarra egunero zarratuko da 13:00etatik 18:00etara. Aurrerantzean, itxiera-ordutegi horretan eremuan sartzen diran ibilgailuak matrikulak irakurtzeko kameren bidez kontrolatuko dira.

Udala apirilaren 15etik ekainaren 15era bitartean egon da baimenak bideratzen, eta ordenantza betetzen dauen edonork eskatu leike aurrerantzean be. Gaurtik aurrera, baimenik eduki barik itxitako tartean portura zein Alde Zaharrera sartzeko behin-behineko baimenak plataforma digital bakar baten bidez izapidetu beharko dira, honako webgunean sartuta: https://oinezkobaimenak.bermeo.eus. Formulario hori izango da behin-behineko baimenak eskatzeko bide bakarra. Orain arteko eskaera guztiak ebatzi dira, eta barriak egunero izapidetzen ari dira. Baimen honeek gehienez sei hilabeteko indarraldia izango dabe; epe hori amaitutakoan, eskabide barria aurkeztu beharko da.

Laguntza Berhazen eta itxiera egutegia

Plataforma digitala erabiltzeko zailtasunak daukazan herritarrek Berhaz bulegoaren laguntza eukiko dabe. Bertako langileek datuak txertatzen lagunduko deutse inor kanpoan ez geratzeko. Erantzun guztiak posta elektronikoz emango dira, eta egoera une oro kontsultatu ahal izango da eskaeraren erreferentzia-kodeagaz.

Gogorarazi behar da Portuzarreko sarbidea mugatuta dagoela urteko sasoi desberdinetan 13:00etatik 18:00etara:

  • Udan: Ekainaren 15etik irailaren 20ra bitartean.

  • Aste Santuan.

  • Gabonetan: Abenduaren 23tik urtarrilaren 6ra bitartean.

  • Jaiegunetan eta urteko asteburu guztietan (bariku, zapatu eta domeketan).

Sarbide-baimenak bertako etxebizitzetan erroldatutakoei, amarristei, portuko eragile ekonomikoei, ostalariei, merkatariei, elkarteei eta lonjen erabiltzaileei zuzenduta dagoz, baldintzak betez gero.

Udalaren ustez, kontrol barri honek Portuzarraren erabilera modu orekatuan antolatzen lagunduko dau, jarduera ekonomikoak eta sozialak bateragarri eginez eta oinezkoen erabilera lehenetsiz, denon gozamenerako espazio publiko atsegin eta kalitatezkoa izan dadin.

Azkenak